أهواك يا هوا المصايف
أهواك وأنا قلبي خايف
أكيد كلنا بنردد الأغنية دي كل صيف وإحنا رايحين المصيف...
وده لأننا بالرغم من حبنا الشديد للمصيف والبحر والبلاج، إلا أننا بنخاف جدا على بشرتنا، وشعرنا من جو المصيف
وعلشان جمالك بيهمنا في كل الأوقات
قررنا نقول لك...
على شوية نصائح تخلي بالك منها وأنت في المصيف...
النصيحة الأولى
اختاري ميعاد مناسب للجلوس على البلاج
أول نصيحة معانا النهارده، هي إنك تختاري ميعاد مناسب للجلوس على البلاج أو لنزول الميه..
أكيد دلوقتي بتقولي بينك وبين نفسك هو فيه ميعاد محدد للجلوس على البلاج أو لنزول الميه، ما هو البحر والبلاج مفتوحين طول الوقت!!
هاقولك...صحيح البحر والبلاج مفتوحين طول الوقت بس أنسب وقت ممكن تنزلي فيه هو الصبح بدري من الساعة 6 صباحا إلى الساعة 10 صباحا، أو العصر الساعة 5، لأن في الوقت ده بتكون أشعة الشمس مش مضرة، وفي نفس الوقت الشاطئ بيكون هادي ومفيش فيه ناس كتير، وبكده تقدري تستمتعي بالميه براحتك، وتبقي ضربتي أكتر من عصفور بحجر واحد حافظتي على بشرتك واستمتعي بالميه براحتك...
وده طبعا على عكس الفترة من الساعة 11 ظهرا إلى الساعة 5 عصرا، اللي بتكون فيها أشعة الشمس مضرة جدا على الجلد وممكن تسبب حروق والتهابات للجلد.
النصيحة الثانية
استخدمي صن بلوك باستمرار
دي دايما النصيحة اللي بنقولها لك، وهي إنك تدهني بشرتك بكريم الوقاية من أشعة الشمس "صن بلوك" علشان تحمي بشرتك من أشعة الشمس المضرة.
طبعا هتقولي طيب لو قاعدة تحت الشمسية برضه أستخدمه...
هقولك أيوه برضه استخدميه، وده لأن الجلوس تحت الشمسية ممكن يضر بشرتك لأن الميه والرمل بيعكسوا أشعة الشمس على بشرتك، وبكده بتلاقي نفسك محتاجة تستخدمي برضه واقي للشمس علشان تحمي بشرتك من أشعة الشمس.
النصيحة الثالثة
ريحي بشرتك من الماكياج
إيه رأيك لو خليتي الكام يوم بتوع المصيف دول فرصة تريحي بشرتك من الماكياج، وتستبدلي ماكياجك بحاجات طبيعية بسيطة زي زبدة الكاكاو أو الجلوس المرطب للشفايف، وكريم مرطب للبشرة تحطيه بالليل قبل ما تنامي.
أعتقد إن ده هيكون أحلى وأضمن، وخصوصا إن ماكياجك وأنت قاعدة على البلاج بيسيح وبيتبهدل بسرعة، نتيجة للميه والرطوبة الموجودة على الشاطئ.
النصيحة الرابعة
خليكِ في الوصفات الطبيعية
اوعي تسمعي كلام أي حد يقولك... إنك علشان تحافظي على لون بشرتك يبقى لازم تستخدمي كريمات تفتيح البشرة وأنت قاعدة على البلاج، لأن ببساطة شديدة جدا كل كريمات التفتيح دي مضرة جدا جدا على البشرة، وده لأنها بتحتوي على مواد بتتفاعل مع الشمس، وممكن لا قدر الله تصيبك بسرطان الجلد..
ولو كنت عايزة تحافظي فعلا على لون بشرتك، يبقى خليكِ في الوصفات الطبيعية اللي ممكن إنك تعمليها كل يوم بالليل قبل ما تنامي زي مثلا وصفة الزبادي بالخيار اللي بتساعد على تفتيح لون البشرة من أشعة الشمس.
النصيحة الخامسة
لا للسشوار في المصيف
إيه رأيك زي ما هتريحي بشرتك من الماكياج وأنت في المصيف تريحي شعرك هو كمان من السشوار؟!
طبعا هتقولي إزاي، ده أنا لازم أستخدم السشوار كل يوم علشان أفرد شعري؟!
هاقولك إن استخدام السشوار مالوش أي أهمية في المصيف، وده لأن الميه والرطوبة اللي بتكون موجودة في البلاج بتحول الشعر بسرعة إلى شعر مموج، واستخدامك للسشوار باستمرار هيعرض شعرك للتقصف.
ولو عايزة تفردي شعرك فعلا بطريقة آمنة يبقى كل يوم بعد ما تغسليه بالشامبو والبلسم المناسبين تتنشفيه كويس وتدهنيه بكريم أو زيت وتلفيه طاقية لمدة ساعة.
النصيحة السادسة
استخدمي الشامبو والبلسم باستمرار
وعلشان تحافظي على شعرك من التقصف والجفاف اللي ممكن يتعرض لهم من تأثير الميه المالحة والرطوبة، يبقى ياريت تحرصي على إنك تستخدمي الشامبو والبلسم المناسبين لنوع شعرك كل مرة هتغسلي فيها شعرك.
النصيحة السابعة
لا للنظارات البلاستيك على الشاطئ
بنات كتير بتلبس النظارات البلاستيك وهي قاعدة على الشاطئ، بس بيني وبينك كده النظارات دي مضرة جدا على العين، وأحسن حاجة علشان تحافظي على عينك من أشعة الشمس وأنت قاعدة على الشاطئ هي إنك تلبسي نظارة شمس أصلية.
